Mihrîcana Ked û Xebata Jinan a Hilberî, ku di bin mêvandariya Şaredariya Îpekyoluyê de bi hevkariya 12 şaredariyan hat rêkûpêkkirin û sê roj dom kir, bi dawî bû.

Festîvala ku jin li dora ked û hilberên xwe civand, di nav sê rojan de ji aliyê gelê bajêr ve bi eleqeyeke mezin hat pêşwazîkirin. Di çarçoveya mihrîcanê de konser, atolyeyên drama, atolyeyên hilberandinê, atolyeyên jineolojiyê û pêşandanên govendê di serî de gelek çalakiyên çandî û hunerî hatin lidarxistin. Di roja dawî ya festîvalê de jî Atolyeya Çapa Linolê û Atolyeya Dermankirin û Tibba Alternatîf hatin organîzekirin.

Hat diyarkirin ku hemû dahata ku ji firotina hilberên di festîvalê de hatine pêşkêşkirin bi tevahî a jinên hilberîner in.

Uzunay: “Her ku jin hildiberînin, parve dikin û bi rêxistin bin, jiyan hinde geştir dibe”

Hevşaredar Canan Uzunay, ku axaftina girtinê ya festîvalê kir, bal kişand ser girîngiya hevgirtina jinan û got:

“Ev şahî careke din nîşan da ku her ku ked û xebata jinan xuya dibe, hevgirtin mezin dibe û hilberandina hevpar xurt dibe, jiyan komunal dibe. Her ku jin hildiberînin, parve bikin û bi rêxistin bibin, jiyan zêdetir geş dibe. Em ê berdewam bikin ku ked û xebata jinan mezin bikin, hevgirtinê xurt bikin û hilberandina hevpar pêş bixin.”

Piştre, Aktîvîsta TJAyê Dîlan Yildiz jî bi bal kişand ser ked, kar û hevgirtina jinan, diyar kir ku têkoşîna jinan di hemû qadên jiyanê de her ku diçe mezintir dibe.

Festîval, bi konsera Performansa Jinên Wanê û govendên jinan bi dawî bû. Ev festîval bi piştgiriya GABBê ve hat lidarxistin.