Şaredariya Tuşbayê xebatên xwe yên ku beşdariya jinan a di warê hilberînê de zêde dike didomîne. Di vê çarçoveyê de, qursa çêkirina abajûrên xemilandî yên ji kundirê avê tên çêkirin dide û qurs rastî eleqeyeke mezin ya jinan tê.

Şaredariya Tuşbayê ku bi nêrîna şaredariya civakî ya taybet li ser jinan xebatên xwe bi rêve dibe, piştî atolyeyên dirûtinê, epoksiyê û filografiyê yên ku berê vekiribû vê carê jî qursa çêkirina abajûrên xemilandî yên ji kundirê avê bi jinan re anî cem hev.

Di qursa ku di bin banê Gerînendehiya Çand, Huner û Karûbarên Civakî de tê lidarxistin de, jin ji aliyekê ve hunereke destan a nû fêr dibin, ji aliyê din ve jî tên li ba hev hilberîna hevpar û yekîtiyê dijîn.

Di perwerdehiyên ku bi materyalên ku ji aliyê şaredariyê ve bi awayekî bêpere têne peyda kirin de, beşdarvan piştî ku kundirên avê yên xwezayî bi baldarî paqij dikin û hundirê wan diperçiqînin, bi nexş û motîfên cuda wan dixemilînin û bi vê yekê abajûrên ji hev cuda amade dikin.

'Keda me xuya dibe'

Fatma Kaya ya ku yek ji kursiyeran e bextewariya xwe a li hrmber atolyeyê parve kir, Kayayê diyar kir ku bi saya qurdê keda destan xuya dibe û wiha got: "Fêrbûna tiştekî nû û kirina wê bi jinan re bi rastî pir bi qîmet e. Bi awayekî cuda bikaranîna kundirê avê û dîsa şeklandina gelek xweş e.”

Kaya ku çêkirina abajûran rave kir wiha pê de çû: "Em kundiran paqij dikin, hundirê wan derdixînin, paşê dineqişînin û bi boyaxkirinê berhemên bi tevahî bi keda xwe ya taybet derdixîne holê. Ez spasiya Şaredariya Tuşbayê dikim ku ev derfet da me û hemû amûr bêpere peyda kir û qîmet da keda jinan."