Şaredariya Tuşbayê, bi armanca ku keda jinê bi axê re bîne cem hev û hilberîna çandiniyê geş bike xebatên xwe didomîne. Di çalakiya ku ji aliyê Gerînendehiya Polîtîkayên Jinan û Gerînendehiya Xizmetên Çandiniyê ve li seraya Şaredariya Îpekyoluyê hat lidarxistin de, bi hezaran tovên zebzeyan bi axê re hatin reşandin.

Hevşaredara Tuşbayê Xanim Akkoş, endamên meclisa jinan û jinên kedkar beşdarî çalakiyê bûn. Di çarçoveya xebatê de tê armanc kirin ku şitilên zebzeyan ên li gorî avhewaya herêmê bên mezin kirin. Beşek ji şitilên ku bên gihandin dê li bostanên ser bi Gerînendehiya Polîtîkayên Jinan bên çandin, beşek jî dê li jinên ku baxçe an jî bostanên wan hene bên belavkirin.


Jin Dê Di Hilberînê De Roleke Çalaktir Bigirin

Hevşaredar Xanim Akkoş a ku li serayê axivî, diyar kir ku armanca projeyê ew e ku jin bi awayekî çalaktir tevlî hilberînê bibin. Akkoş bal kişand ser rola jinê ya hilberînê a dîrokî û got: “Em îro ne tenê tovên zebzeyan, bîreweriya jinê ya bi hezaran salan jî ji nû ve diçînin. Ev xebat, bi piştevaniya şaredariyên Îpekyolu û Tuşbayê, nîşaneya berbiçav a têgihîştina me ya şaredariya ekolojik e.”

Teqezkirina Li Ser Jiyana Ekolojîk

Akkoş qala bandorên pergala qapîtalîst ên li ser xweza û kedê jî kir û wiha pê de çû: “Di dirêjahiya dîrokê de ya ku tov parastiye, ax çandiye û jiyan afirandiye jin e. Lê mixabin modernîteya qapîtalîst ax kiriye meta, jin ji hilberînê qut kiriye û xweza talan kiriye. Em bi anîna destê jinê li ser axê, nîşan didin ku jiyaneke ekolojîk pêkan e. Ev şitilên ku em îro diçînin, dê sibehê di destê jinan de li taxên me mezin bibin.”

Akkoş herî dawî got: “Em spasiya hemû hevalên xwe yên ked dane û Şaredariya me ya Îpekyoluyê ya ku piştevaniya xwe nîşan daye dikin.”