"Baxçeyê Bajarî yê Jinan ê Xanê Akdoğan", ku li seranserê herêmê di bin serokatiya Yekîtiya Şaredariyên Herêma Başûrê Rojhilatê Anatoliyê (GABB) de tê meşandin û ji hêla Şaredariya Tuşbayê ve tê bicîhanîn, hate vekirin.

Baxçeyê Bajarî yê Jinan ne tenê qadeke çandiniyê ye; ew wekî qadeke jiyanê ya ku hevgirtin, hilberîn û azadiya jinan lê geş dibe hatiye sêwirandin. Bi saya projeyê, jin hem ji hêla aborî ve dê werin xurtkirin û hem jî bi hişmendiya hilberîna ekolojîk dê beşdarî bajêr bibin.

Hevşaredara Bajarê Mezin a Wanê Neslihan Şedal, çalakvanên Tevgera Jinên Azad (TJA), Meclîsa Dayikên Aştiyê, Hevşaredara Şaredariya Tuşbayê Hanım Akkoş, endamên Meclisa Şaredariyê û jinên taxê beşdarî vekirina baxçeyê sebzeyan li Taxa Altintepe ya Tuşbayê bûn, ku îro li wir şitlên pêşîn hatin çandin.

"Têkoşîna me heta ku xizanî bi dawî bibe dê berdewam bike"

Endama Meclîsa Dayikên Aştiyê Xecê Akdogan di vekirinê de axivî û spasiya şaredariyê kir. Piştre Hevşaredara Bajarê Mezin a Wanê Neslihan Şedal axivî û got, "Îro ji bo me hemûyan rojek girîng û watedar e. Ji aliyekî ve em bi heyecan in, ji aliyê din ve em xemgîn in. Dayika me Xemê, ku navê wê li ser vê baxçeyê hatiye danîn, di tevahiya jiyana xwe de têkoşîneke mezin da. Li Tuşbayê, destên jinan dê roj bi roj bi axê re bigihîjin hev. Çawa ku jinan bi axê jiyaneke nû çêkirin, ew ê îro jî vê jiyanê bidomînin. Em ê hewl bidin ku di bin pêşengiya jinan de aboriyeke azad biafirînin. Bi salan e xizaniya jinan bi zanebûn kûrtir bûye. Em ê heta ku ev xizanî bi dawî bibe têbikoşin û çavkaniyên xwe seferber bikin."

 

'Em ê Xebata Xwe Ji Bo Jinan Di Her Qadê De Bidomînin'

Di dawiyê de, Hevşaredara Tuşbayê Hanım Akkoş got, "Hewldanên dayika me Xanê ji bo me hemûyan mezin in. Dayika me bi salan ji bo aştiyeke mayînde, ji bo pêşîgirtina li komkujiyên jinan û ji bo ku ciwan jiyaneke baş bijîn xebitî. Divê her tim behsa hewldanên dayikên me yên ku bi zehmet xebitîn were kirin. Em ê şitlên xwe bi destên jinên xwe biçînin. Wekî Şaredariya Tuşbayê, em ê her tim li kêleka jinan bin. Em ê xebata xwe ji bo ku jin di her qadê de bin bidomînin."

Piştî axaftinan, baxçe hate vekirin. Jinan şitl çandin û bi erbanê re govend gerandin.